Kuvendi i Kosovës ka miratuar sot një rezolutë që kërkon lirimin e kreut të AAK-së, Ramush Haradinajt, ku të gjitha grupet parlamentare kanë dhënë mbështetjen e tyre. Kështu, nga 79 deputetë që ishin në sallë, 78 kanë qenë “pro” rezolutës, ndërsa vetëm një ka qenë kundër. Ndër të tjera, kjo rezolutë parasheh edhe pezullimin e dialogut me Serbinë deri në lirimin e ish-kryeministrit të Kosovës, Haradinaj. Ky i fundit, po mbahet në Francë që nga fillimi i këtij viti, mbi bazën e një fletë-arresti serb për krime lufte.
Miratimi nga Kuvendi i Kosovës të rezolutës që kërkon lirimin e ish-kryeministrit të Kosovës është përshëndetur në fund të seancës së sotme parlamentare edhe nga Kreu i Parlamentit shqiptar, Ilir Meta. “Përshëndes rezolutën e sapomiratuar nga parlamenti i Kosovës që kërkon lirimin pa kushte të Haradinajt”, – ka pohuar Ilir Meta në fund të punimeve të seancës së sotme plenare.
Pikat e rezolutës:
Lirimi i pakusht i Ramush Haradinaj të ndodhë sa më shpejt dhe të konsiderohet detyrë primarë shtetërore.
Pezullimi i dialogut me Serbinë deri në lirimin e Haradinjat.
Qeveria të kërkojë nga BE që të pastroj listat e fletë-arresteve nga Serbia për qytetarët e Kosovës.
Qeveria dhe institucionet e Kosovës të marrin veprimin dhe të informojë shtetet tjera që refuzon juridiksionin e njëanshëm të Serbisë.
